– आठवडी बाजारात धावपळ!
साखरखेर्डा (अशोक इंगळे) – साखरखेर्डा मंडळात १५ ऑगस्टरोजी सायंकाळी तब्बल एक तास मुसळधार पाऊस पडल्याने नदी, नाल्यांना पूर आल्याने शेतात पाणीच पाणी चहूकडे पसरले होते. वीज पडून एक बैल ठार झाला आहे, सतत पावसामुळे जनजीवन विस्कळित झाले आहे. काल, दि.१५ ऑगस्टरोजी सायंकाळी पाच वाजता आभाळ दाटून आले होते. विजांच्या कडकडाटात धुव्वाधार पावसाला सुरुवात झाली. पावसाचा एवढा वेग होता, की भोगावती नदीजवळील महादेव मंदीराला पाण्याचा वेढा पडला होता.
सवडद ते गजरखेड पूल वाहिला!
सवडद ते गजरखेड हा रस्ता पाटबंधारे विभागाकडे असून, या रस्त्यावरील सवडदजवळील कोराडी नदीवरील पूल वाहून गेला आह. कोराडी धरणाचे पाणी सवडद गावापर्यंत येत असल्याने पाणी पुलाच्या मागे ५ हजार मीटरपर्यंत पसरलेले असते. काल हा पुलंचं पुरामुळे वाहून गेला असल्याने सवडद येथील शेतकर्यांना शेतात जाण्यासाठी रस्ताच राहिला नाही. सवडद येथील शेकडो हेक्टर शेतजमीन नदीच्या पलीकडे आहे. आज त्या शेतकर्यांना शेतात जाण्यासाठी रस्ताच राहिला आहे. त्यामुळे पाले, भाजी घेणार्यांचे प्रचंड नुकसान होत आहे. त्या भागातील शेतकर्यांना लव्हाळा येथून गजरखेड मार्ग असा १५ किलोमीटर अंतरावरचा फेरफटका मारावा लागतो. तरी या पुलाचे काम तत्काळ करावे, अशी मागणी कृषी उत्पन्न बाजार समितीचे माजी सभापती तेजराव देशमुख यांनी केली आहे. शिंदी येथील रस्त्याने वाहणारे पाणी नागरिकांच्या घरात घुसून सामानाची नासाडी झाली आहे. अनेक घरांमध्ये पाणी शिरले, भिंती पडल्या असून, गावाच्या मधोमध पुराच्या पाण्यामुळे दरी पडली आहे.
