– मेहकर येथे महापुरूषांच्या संयुक्त जयंती समारंभात डॉ. कोल्हे यांचे घणाघाती भाषण
– गरिबांची घरं मोडून विकास होत नसतो; अतिक्रमण हटाव मोहिमेवरून सत्ताधार्‍यांना टोला
– गद्दारी ही आपली परंपरा नाही, आ. सिद्धार्थ खरात यांनीही शिंदे गटाला फटकारले!
मेहकर (तालुका प्रतिनिधी) – केंद्र सरकारने बळीराजासाठी अंदाजे आठ लाख कोटी खर्च केले, मात्र एका वर्षात उद्योगपतींचे १७ लाख कोटी रूपयांचे कर्ज माफ केले. तेव्हा हा देश कोणाचा? हा विचार करण्याची गरज निर्माण झाली आहे. शेतकर्‍यांना कर्जमाफीचा शब्द दिला आणि त्यांच्याकडून सत्ता मिळवली. पण, आता त्यांनी शब्द फिरवला आहे. तेव्हा, शेतकर्‍यांना हातात आसूड घेण्याची वेळ आली आहे, असे जोरदार टीकास्त्र राष्ट्रवादी काँग्रेस (शरद पवार)चे खासदार तथा अभिनेते डॉ. अमोल कोल्हे यांनी डागले. मेहकर येथे स्वातंत्र्य मैदानावर ज्योती-सावित्री सेवा संघाच्यावतीने छत्रपती श्री शिवाजी महाराज, महात्मा ज्योतिबा फुले व भारतरत्न डॉक्टर बाबासाहेब आंबेडकर यांच्या संयुक्त जयंती निमित्ताने आयोजित कार्यक्रमात ते प्रमुख वक्ते म्हणून बोलत होते.
यावेळी मेहकरचे शिवसेना (उद्धव बाळासाहेब ठाकरे) आमदार सिद्धार्थ खरात आपल्या भाषणात म्हणाले की, मेहकरला चांगल्या कार्यक्रमाचे आयोजन केले आहे. मेहकरचा आमदार म्हणून यापुढेही माझे अशा कार्यक्रमांना सहकार्य राहील. आपली महाराष्ट्राची परंपरा थोर आहे. गद्दारी ही आपली परंपरा नाही. गद्दारांच्याविरुद्ध महाराष्ट्र आहे. समता, स्वातंत्र्य, न्यायाची परंपरा आपली आहे. यावेळी माजी मंत्री डॉ. राजेंद्र शिंगणे, काँग्रेसचे राज्य सरचिटणीस श्याम उमाळकर यांचीसुद्धा भाषणे झाली. कार्यक्रमाच्या आयोजक रंजना प्रकाश सौभागे व जया अरुण बळी तसेच आरती दीक्षित यांनी प्रमुख वक्ते डॉ. अमोल कोल्हे व मान्यवरांचा सत्कार केला. यावेळी कार्यक्रम मंचावर राष्ट्रवादीचे प्रदेश सदस्य भास्करराव काळे, माजी सभापती भास्करराव गारोळे, राजश्री प्रतापराव जाधव, रंजना संजय रायमुलकर, माजी नगरसेविका डॉ.दीपिका रवी रहाटे, उपजिल्हाप्रमुख आशीष रहाटे, शहर प्रमुख किशोर गारोळे, काँग्रेसचे अनंत वानखेडे, युवा सेनेचे आकाश घोडे, सिंदखेडराजा येथील शिवाजीराव जाधवसह मान्यवर उपस्थित होते. प्रास्ताविक आयोजिका रंजना प्रकाश सौभागे यांनी, सूत्रसंचलन ज्येष्ठ पत्रकार सिद्धेश्वर पवार तर आभार आयोजिका जया अरुण बळी यांनी मानले. राष्ट्रगीताने कार्यक्रमाची सांगता झाली.
