– रक्तदान महायज्ञाचे समारोप; राज्यात २७०० पिशव्या रक्तसंकलीत! – शिवसेनेचे जिल्हा समन्वयक, राजर्षी शाहू परिवाराचे अध्यक्ष संदीपदादा शेळके यांचा वाढदिवस जिल्हाभर साजरा
बुलढाणा (जिल्हा प्रतिनिधी) – कुठलेही कार्य करीत असतांना त्याबद्दल निष्ठा आणि समर्पण असणे अत्यंत गरजेचे आहे. तेंव्हाच ते कार्य यशस्वी होऊ शकते. संदीप शेळके गेल्या दोन तपापासून सहकार आणि समाजकारणात असून, आता राजकारणातही सक्रिय झाले आहेत. संघटन आणि पक्षीय जबाबदार्या समर्थपणे सांभाळत आहेत. जिल्ह्याच्या राजकारणातील ते युवा आश्वासक चेहरा आहेत, असे गौरवोद्गार काँग्रेसचे प्रदेशाध्यक्ष हर्षवर्धन सपकाळ यांनी काढले.
शिवसेना (ठाकरे) पक्षाचे जिल्हा समन्वयक संदीप शेळके यांच्या वाढदिवसानिमित्त स्थानिक गर्दे वाचनालयाच्या सभागृहात आयोजित रक्तदान महायज्ञाचा समारोप आज, दि. १३ मार्चरोजी झाला. याप्रसंगी हर्षवर्धन सपकाळ हे बोलत होते. मंचावर शिवसेना संपर्क प्रमुख नरेंद्र खेडेकर, राजर्षी शाहू परिवाराचे संस्थापक भाऊसाहेब शेळके, अभिता कंपनीचे सीईओ सुनील शेळके, शिवसेना नेत्या जयश्रीताई शेळके, जिल्हा संघटक डी. एस. लहाने, युवासेना जिल्हाप्रमुख नंदू कर्हाडे, तालुकाप्रमुख लखन गाडेकर, गजानन उबरहंडे, गणेश जाधव, एकनाथ कोरडे, विजय इंगळे, अशोक गव्हाणे, विजय इतवारे, अनिकेत गवळी, संजय शिंदे, मोहम्मद सोफियान, राहुल जाधव, संजय गवळी, श्याम पाटील सावळे, समाधान जाधव यांच्यासह पदाधिकारी कार्यकर्ते उपस्थित होते.
राजर्षी शाहू मल्टिस्टेट आणि वन बुलढाणा मिशनच्यावतीने ५ फेब्रुवारी ते १३ मार्चदरम्यान रक्तदान महायज्ञाचे आयोजन करण्यात आले होते. दरम्यान, आज या रक्तदान महायज्ञाचा समारोप झाला. याअंतर्गत राज्यभर आयोजित रक्तदान शिबिरामध्ये २७०० पिशव्या रक्त संकलित झाले आहे. तर याप्रसंगी बोलताना शिवसेना (ठाकरे) जिल्हाप्रमुख जालिंदर बुधवत म्हणाले, की राजर्षी शाहू परिवाराच्या माध्यमातून गेली २३ वर्षे संदीप शेळके सहकार आणि सामाजिक कार्यात अग्रेसर आहेत. समाजोपयोगी विविध सामाजिक उपक्रम राबवण्यास त्यांनी नेहमीच प्राधान्य दिले आहे. सामाजिक कार्यामुळे त्यांचे राजकीय भवितव्य उज्ज्वल आहे. यावेळी बोलतांना संदीप शेळके म्हणाले की, रक्तदान हे जीवनदान आहे. रक्ताचा एक थेंब गरजू रूग्णांचे प्राण वाचवू शकतो. त्यामुळे रक्तदान चळवळ घराघरांत पोहचवण्यासाठी आपण सतत प्रयत्न करणार आहोत. राजकारणात असलो तरी सामाजिक कार्याचा वसा सोडणार नाही, अशी ग्वाही त्यांनी दिली.
शिवसेना पक्षाचे जिल्हा समन्वयक तथा राजर्षी शाहू परिवाराचे अध्यक्ष संदीपदादा शेळके यांनी सोशल मीडियावर टाकलेली पोस्ट सर्वांचे लक्ष वेधून घेत आहे. आज, १३ मार्च रोजी त्यांचा वाढदिवस होता. समर्थकांना बॅनर लावण्यास नगरपालिकेने मनाई केली आहे. होर्डिंग्जसवाल्यांकडे कर थकीत असल्याने शहरात बॅनर लावू दिले नसल्याचे कारण पालिका प्रशासनाने पुढे केले आहे. मात्र पालिकेचे हे उत्तर पटेनासे असून, संदीपदादा समर्थकांकडून रोष व्यक्त करण्यात येत आहे. संदीपदादा शेळके यांच्या वाढदिवसाच्या निमित्ताने जिल्हाभर विविध सामाजिक उपक्रमांचे आयोजन करण्यात आले होते. तर गर्दे वाचनालयाच्या सभागृहात रक्तदान शिबिर आयोजित केले होते. जिल्हाभर शुभेच्छांचे बॅनर लागले आहेत. मात्र बुलढाणा पालिकेने बॅनर लावण्यास मनाई केली. पालिकेवर कुणाचा दबाव आहे का? सूडबुद्धीने ही परवानगी नाकारण्यात आल्याची चर्चा कालपासून शहरात रंगली आहे. सोशल मीडियावरसुद्धा समर्थकांनी नाराजी व्यक्त केल्याचे दिसून येत आहे.
