– अवैध वाळू वाहतूक सुरूच; एका ट्रॅक्टरवर कारवाई, बाकीच्या ६० ते ६५ टिप्परवर कारवाई कधी?
सिंदखेडराजा (सुरेश हुसे) – तालुक्यातील अवैध रेती उत्खननाचे माहेरघर असलेल्या हिवरखेडपूर्णा येथील अवैध रेती उत्खनन व वाहतूक करणारे एक ट्रॅक्टर हिवरखेडपूर्णाचे तलाठी पवार यांनी आज (दि. २ मार्च) दुपारी २ वाजता अवैध रेती वाहतूक करताना पकडून किनगावराजा पोलिस स्टेशनमध्ये अटकाव केले आहे. तथापि, येथील वाळूतस्करी सुरूच असल्याने महसूल प्रशासन वाळूतस्करांचा बिमोड कधी करणार, असा प्रश्न निर्माण झाला आहे.
या ट्रॅक्टरवर कारवाई केली असली तरी हिवरखेडपूर्णा येथील १५ ते २० टिप्पर अवैध रेती वाहतूक करताना या तलाठ्यांना दिसत नाही का? असा प्रश्न उपस्थित होत आहे. सिंदखेडराजा मतदारसंघातील खडकपूर्णा जलाशयातून ६० ते ६५ बोटीद्वारे अवैध रेती उत्खनन व वाहतूक मोठ्या प्रमाणात सुरू आहे व सिंदखेडराजा तालुक्यातील खडकपूर्णा नदीपात्रातून मोठ्या प्रमाणात अवैध रेती उत्खनन व वाहतूक सुरू असताना, कर्तव्यदक्ष उपविभागीय अधिकारी प्रा. संजय खडसे हे अवैध रेती उत्खनन व वाहतूक बंद करण्यात यशस्वी का होत नाही? तसेच या अवैध रेती वाहतूक मागचा मुख्य ‘आका’ कोण? हा प्रश्न सिंदखेडराजा मतदारसंघातील जनतेला पडला आहे.
