अनैतिक संबंधात बायकोचा अडथळा; डॉक्टरने दरोड्याचा बनाव करून गळा घोटला!

– दाभाडी दरोड्याचा धक्कादायक उलगडा; ‘ब्रेकिंग महाराष्ट्र’ने सांगितले होते हा दरोडा संशयास्पद!
– डॉ. गजानन टेकाळेने पत्नी माधुरीला झोपेच्या गोळ्या दिल्या; उशीने तोंड दाबून श्वास गुदमरून मारले!

बुलढाणा (जिल्हा प्रतिनिधी) – मोताळा तालुक्यातील दाभाडी येथे बसस्टँडजवळ दाताळा रोडवर राहणारे पशुवैद्यकीय डॉक्टर गजानन टेकाळे यांच्या घरी दि. १८ जानेवारीरोजी मध्यरात्रीच्या सुमारास दरोडा पडून दरोडेखोरांनी केलेल्या बेदम मारहाणीत त्यांच्या पत्नी डॉ. माधुरी टेकाळे यांचा निर्घृण खून केला होता तर डॉ. गजानन टेकाळे यांना बेदम मारहाण झाल्याने ते बेशुद्धावस्थेत पडले होते, अशी घटना उघडकीस आली होती. घटना घडली तेव्हा घरात पती-पत्नी दोघेच होते. सकाळी पाच वाजता दरोडा पडल्याची घटना शेजारी राहणार्‍या त्यांच्या नातेवाईकांच्या लक्षात आली होती. परंतु, या घटनेचा धक्कादायक खुलासा पोलिसांनी केला असून, अनैतिक संबंधात अडथळा ठरत असल्याने डॉ. गजानन टेकाळे यांनीच पत्नी डॉ. माधुरी हिचा झोपेच्या गोळ्या देऊन व उशीने नाक-तोंड दाबून गुदमरून जीव घेतला असल्याचे उघड झाले आहे. विशेष म्हणजे, या दरोडा संशयास्पद असल्याचे ब्रेकिंग महाराष्ट्रने पहिल्याच बातमीत स्पष्ट केले होते. पोलिसांनी मोठ्या शिताफीने व तांत्रिक सहाय्याने या घटनेचा तपास करून पती डॉ. गजानन टेकाळे याच्या मुसक्या आवळल्या आहेत. बोराखेडी पोलिसांनी आरोपी डॉ.गजानन टेकाडे याला अटक केली असून, त्याला आज न्यायालयासमोर उपस्थित केले जाणार आहे.

डॉ.गजानन टेकाडे हा मोताळा तालुक्यातील प्रसिद्ध पशुवैद्यकीय डॉक्टर असून, दाभाडी परिसरात त्याचे चांगले नाव झालेले आहे. सोबत त्याचे उत्पन्नही चांगले आहे. डॉ. माधुरी यांच्यासोबत लग्न झाल्यानंतर सुरूवातीला त्यांचा संसार चांगला झाला, त्यांना एक मुलगी असून, ती इयत्ता दहावीत आहे. परंतु, पत्नीच्याच नात्यातील एका मुलीसोबत त्याचे अनैतिक संबंध सुरू झाले. गेले दहा वर्षे हे संबंध असून, ही मुलगी त्यांना लग्नासाठी गळ घालू लागली होती. नात्यातील असल्याने ही तरूणी डॉक्टरच्या घरीही येत होती व मुक्कामी थांबत होती. तसेच, डॉक्टरही तिच्याकडे नेहमी जात असे. दोघांच्या अनैतिक संबंधाचे डॉ. गजानन टेकाळे याने नको त्या अवस्थेतील फोटो व व्हिडिओदेखील या डॉक्टरने काढले होते. या तरुणीवर घरच्यांकडून लग्नासाठी दबाव वाढत चालला होता. पण तिने आरोपी डॉक्टरवर लग्नासाठी दबाव टाकणे सुरु केले. ‘माझी लाईन क्लिअर करा… लग्न करा नाहीतर मी माझ्या जीवाचे बरे वाईट करेन’, अशी धमकी या तरूणीने डॉक्टरला दिली होती. त्यामुळेच डॉ. टेकाळे याने पत्नी डॉ. माधुरी यांचा खून करण्याचा प्लॅन रचला व दरोड्याचा बनाव करून त्यांचा अर्धवट झोपेत असताना उशीने नाक-तोंड दाबून जीव घेतला. ज्या रात्री दरोड्याचा बनाव रचण्यात आला, त्या दिवशी डॉ. टेकाळे याने पत्नी माधुरी यांना अपचनाच्या गोळ्या म्हणून झोपेच्या गोळ्या खाऊ घातल्या. व रात्री अंदाजे ११ वाजेच्या सुमारास माधुरीला अर्धवट झोपेत असताना उशीने नाक तोंड दाबून तसेच गळा आवळून संपविले. त्यानंतर कपाट अस्ताव्यस्त करून, पत्नीचे दागिने लपवून ठेवले व स्वतः बेशुद्ध पडण्याचे सोंग करून पहाटेपर्यंत पडून राहिला. परंतु, चाणाक्ष अशा स्थानिक गुन्हे शाखा, बोराखडी पोलिस यांनी आरोपी हा बरोबर हेरला व पूर्ण पुराव्यानिशी त्याच्या आज अखेर मुसक्या आवळल्या आहेत.

डॉ. गजानन टेकाळे हा १९ तारखेपर्यंत दवाखान्यात होता. त्यादरम्यान, पोलिसांनी त्याच्या घराची पाहणी केली, त्याचा मोबाईल ताब्यात घेतला. या मोबाईलमध्ये या तरूणीसोबतचे अश्लील फोटो व व्हिडिओ पोलिसांना सापडले. त्या एका सुतावरून स्वर्ग गाठत पोलिसांनी डॉ. गजानन टेकाळे याला ताब्यात घेऊन विचारपूस करत या खुनाचा उलगडा केला आहे.