– अमित शाह, नड्डा उपस्थित राहणार
– मुख्यमंत्री देवेंद्र फडणवीस यांचा होणार भव्य सत्कार
अहिल्यानगर (जिल्हा प्रतिनिधी) : शिर्डी येथे स्वामी विवेकानंद यांच्या जयंतीदिनी, दि. १२ जानेवारी रोजी प्रदेश अधिवेशन होणार असल्याची माहिती प्रदेशाध्यक्ष चंद्रशेखर बावनकुळे यांनी दिली. यात केंद्रीय गृहमंत्री अमित शाह आणि पक्षाचे राष्ट्रीय अध्यक्ष जे. पी. नड्डा उपस्थित राहणार आहेत. मुख्यमंत्री देवेंद्र फडणवीस यांचा या अधिवेशनात भव्य सत्कार केला जाणार आहे. दरम्यान, या अधिवेशनासाठी कॅबिनेट मंत्री राधाकृष्ण विखे पाटील यांच्यावर विशेष जबाबदारी टाकण्यात आली असून, अधिवेशनाची जय्यत तयारी सुरू आहे.
शिर्डी येथील अधिवेशनासाठी राज्यभरातून सुमारे १० हजार पदाधिकारी आणि कार्यकर्ते उपस्थित राहणार असल्याचे बावनकुळे यांनी सांगितले. तरूणाईशी संपर्क वाढविण्यासाठी विशेष अभियान राबविण्यात येणार असल्याने हे अधिवेशन भाजपाच्या आगामी काळातील योजनांसाठी महत्त्वाचे असेल, असेही बावनकुळे यांनी म्हटले आहे.
