– स्वाक्षरी मोहिमेने आंदोलनाची सुरूवात; आंबेडकरांनी जारी केला व्हिडिओ!
बुलढाणा (बाळू वानखेडे) – वंचित बहुजन आघाडीच्यावतीने राज्यभरात ईव्हीएमविरोधी जनआंदोलन उभारण्यात येणार असून, ज्याची सुरुवात स्वाक्षरी मोहिमेपासून होणार आहे. तर पुढे टप्याटप्प्याने हे आंदोलन तीव्र करण्यात येणार आहे. विधानसभा निवडणुकीच्या पार्श्वभूमीवर काल, रविवारी पुणे येथे झालेल्या राज्य कार्यकारिणी बैठकीत हा निर्णय घेण्यात आला आहे. ३ डिसेंबर ते १६ डिसेंबर असे सलग पंधरा दिवस राज्यभर ईव्हीएमविरोधी स्वाक्षरी मोहीम राबविण्यात येणार असून, याबाबतचे जाहीर आवाहन अॅड. प्रकाश आंबेडकर यांनी एक व्हिडिओ जारी करून केले आहे.
दरम्यान, विधानसभा निवडणूक निकाल लागल्यानंतर काँग्रेससहीत महाविकास आघाडीतील घटकपक्षांनी ईव्हीएमविरोधात आवाज उठवला आहे. विधानसभा निवडणुकीचा निकाल लागल्यानंतर मतदान प्रक्रियेवर संशय व्यक्त करून वाढलेल्या मतांच्या टक्क्याकडे बोट दाखवत हा जनतेने दिलेला निकाल नाही, असे मत महाविकास आघाडीकडून व्यक्त करण्यात आले आहे. यानंतर आता वंचित बहुजन आघाडीनेही ईव्हीएमविरोधात एल्गार पुकारला आहे.
