बुलढाणा (संजय निकाळजे) – आदिवासी शासकीय मूलभूत योजनांपासून वंचित राहू नये म्हणून शासनाने राज्यातील 20 जिल्ह्यांमधील 5730 गावे अनुसूचित क्षेत्रात प्रस्तावित केली आहेत. त्यामध्ये बुलढाणा जिल्ह्यातील 62 गावांचा समावेश आहे.
सद्यस्थितीत अनुसूचित क्षेत्रात आदिवासी बहुल लोकसंख्या असणाऱ्या गावांची संख्या कमी तर क्षेत्राबाहेर असणाऱ्या गावांची संख्या मोठ्या प्रमाणात असल्याने अनेक शासकीय योजना पासून आदिवासी व गैर आदिवासींना वंचित राहावे लागत होते. या सर्व बाबींचा विचार करून आदिवासी क्षेत्रातील अपात्र गावे वगळणे व पात्र गावांचा समावेश करण्याचा निर्णय घेण्यात आला आहे. त्यानुसार जिल्हा निहाय अनुसूचित क्षेत्र प्रस्तावित गावे पुढील प्रमाणे आहेत. गडचिरोली 1142, नंदुरबार 830, धुळे 206, जळगाव 64, पुणे 138, अमरावती 408, अहमदनगर 112, चंद्रपूर 345, पालघर 696, नाशिक 842, ठाणे 165, यवतमाळ 231, नांदेड 71, बुलढाणा 62, अकोला 30, वर्धा 04, नागपूर 119, भंडारा 45, गोंदिया 196, रायगड 24 असे एकूण 5730 गावे अनुसूचित क्षेत्रात प्रस्तावित असून 1309 गावे अनुसूचित क्षेत्रातून वगळण्यासाठी प्रस्तावित केली आहे. यात प्रामुख्याने साधारणता 40 टक्के पेक्षा जास्त परंतु 50 टक्के पेक्षा कमी आदिवासी लोकसंख्या असलेली गावे नव्याने प्रस्तावित केली आहेत.
