पुणे (सोनिया नागरे) – डीएड (शिक्षणशास्त्र पदविका) झालेल्या शिक्षकांना कायमस्वरूपी नोकरी लावण्यासाठी १२ लाख तर बी.एड. झालेल्या उमेदवारांकडून १४ लाख रुपये उकळल्याप्रकरणी आरोपी असलेल्या राज्य परीक्षा परिषदेच्या आयुक्त शैलजा दराडे यांना अखेर अटक करण्यात आली आहे. शैलजा दराडे या त्यांचा भाऊ दादासाहेब दराडेमार्फत हे पैसे घेत होत्या. हडपसर पोलिसांनी ही कारवाई केली आहे. दरम्यान, दराडे यांनी जामिनासाठी न्यायालयात धाव घेण्याची तयारी चालवली होती.
याबाबत पोपट सुखदेव सूर्यवंशी ( रा. खाणजोडवाडी, आटपाडी, सांगली) यांनी फिर्याद दिली आहे. सूर्यवंशी शिक्षक असून त्यांच्या नात्यातील महिलेला शिक्षक पदावर नोकरी पाहिजे होती. जून २०१९ मध्ये सूर्यवंशी यांची भेट आरोपी दादासाहेब दराडे याच्याशी झाली. त्याने बहीण शैलजा दराडे शिक्षण विभागात अधिकारी असल्याचे सांगितले. मी तुमच्या दोन नातेवाईक महिलांना शिक्षक पदावर नोकरी लावतो, असे सांगितले. आरोपी दादासाहेबने त्यांना आमिष दाखवून त्यांच्याकडून हडपसरमध्ये २७ लाख रुपये घेतले. काही महिने उलटल्यानंतरही नातेवाईक महिलांना नोकरी न लावल्याने सूर्यवंशी यांनी पैसे मागितले. मात्र, त्याने पैसे परत न देता फसवणूक केली. शिक्षण विभागात नोकरी लावण्याच्या आमिषाने ४४ जणांची ५ कोटींची फसवणूक झालेली आहे. याप्रकरणी फेब्रुवारी महिन्यात शैलजा दराडे यांच्यासह त्यांचा भाऊ दादासाहेब रामचंद्र दराडे ( रा. इंदापूर) यांच्याविरुद्ध हडपसर पोलिस ठाण्यात गुन्हा दाखल करण्यात आला होता.
भ्रष्टांच्या जागेवर भ्रष्टच!
काही महिन्यांपूर्वी राज्य शिक्षण परीषदेच्या दोन अध्यक्षांना टीईटी घोटाळ्यात अटक झाल्यानंतर त्या जागेवर शैलजा दराडे यांची नियुक्ती करण्यात आली. पण स्वतः दराडे देखील भ्रष्टच निघाल्याने आता नवी नियुक्ती करताना सरकारला मोठ्या अडचणींचा सामना करावा लागणार आहे.
